Parisin Yeni Kaledoniya ilə bağlı siyasəti dalana dirənib | Mariya Zaxarova

“Rusiyanın Xarici İşlər Nazirliyi Fransanı etirazçılara qarşı əsassız zorakılıqdan çəkinməyə və Yeni Kaledoniyanın yerli əhalisinin hüquq və azadlıqlarının qorunmasını təmin etməyə çağırır”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib.

O bildirib ki, ictimai narazılığın artmasının səbəbi 1998-ci ildən bəri Yeni Kaledoniyada mövcud olan yerli seçki qaydasının dəyişdirilməsini nəzərdə tutan və bu adada 10 ildən çox yaşayan hər kəsə səsvermə hüququ tanıyan qanun layihəsinin Fransa parlamentində müzakirəsinin planlaşdırılmasıdır.

“Bu qanun layihəsi Parisin səbəbsiz olaraq kanakları öz müqəddəratını təyinetmə hüququndan tam məhrum etmək, müstəqillik tərəfdarlarının mövqelərini pozmaq cəhdini güdür”, – deyə Mariya Zaxarova bildirib.

Onun sözlərinə görə, Yeni Kaledoniyadakı böhran göstərir ki, Fransanın dənizaşırı ərazilər adlandırılan keçmiş müstəmləkələri ilə bağlı siyasəti hazırda dalana dirənir.

“Rusiya xarici dövlətlərin daxili işlərinə qarışmır. Bu üsul daha çox Qərb və Fransa üçün xarakterikdir. Yelisey sarayı başqalarına dərs keçmək əvəzinə öz dərin problemlərinə nəzər yetirməli idi”, – deyə M.Zaxarova əlavə edib.