Paşinyan bu sənədi inkar etdi | Ermənistan indi buna hazırdır ki...

Ermənistanın Baş naziri Nikol Paşinyan ölkənin nəqliyyat yolları üzərində suverenliyindən imtina etməsi barədə bəyanatları təkzib edib.

Bu barədə hökumət başçısı İrəvanda keçirilən Avrasiya Hökumətlərarası Şurasının iclasında bildirib.

O bəyan edib ki, Ermənistan öz ərazisində yüklərin, nəqliyyat vasitələrinin və insanların keçidinin təhlükəsizliyini tam təmin etməyə hazırdır.

“Ermənistanın hansısa sənəddə guya üçüncü ölkələrin onun ərazisində kommunikasiyaların təhlükəsizliyini təmin etməsinə görə razılaşması barədə iddialar həqiqəti əks etdirmir. Bu, Ermənistanın regional kommunikasiyalar məsələsində öz suverenliyinin hər hansı məhdudlaşdırılmasına razılaşmasına dair şərhlərə də aiddir. Belə bir hal heç vaxt qeydə alınmayıb. Yüklərin çatdırılma müddətinin azaldılması, Asiya ilə Avropa, Şimal ilə Cənub arasında yeni alternativ kommunikasiyaların axtarışı baxımından Ermənistan hökumətinin “Sülh kəsişməsi” layihəsinə diqqət çəkmək istərdim. Layihənin məqsədi maraqlı olan dövlətlər arasında ticarət-iqtisadi əlaqələrin inkişafı üçün ən münbit şəraitin yaradılması, o cümlədən ölkələrin suverenliyi və yurisdiksiyasına tam hörmət, bərabərlik və qarşılıqlılıq prinsipləri əsasında regionda logistika potensialının əhəmiyyətli dərəcədə artırılmasıdır”, – o bildirib.

Paşinyan həmçinin Ermənistan üçün səmərəli nəqliyyat-logistika siyasətinin həyata keçirilməsinin aktuallığını qeyd edib.