Paşinyan qaz kəmərinin çəkilməsi planlarını açıqlayıb

Ermənistan Baş naziri Nikol Paşinyan ölkə ərazisindən tranzit qaz kəmərinin çəkilməsi planlarını açıqlayıb.

O bunu seçkiqabağı kampaniya çərçivəsində seçicilərlə görüşdə bəyan edib.

“Ölkəmizin ərazisindən qaz kəməri keçəcək, biz bu tranzitə görə qaz alacağıq”, – deyə Ermənistanın Baş naziri bildirib.

Paşinyanın sözlərinə görə, Ermənistan artıq şərqdən qərbə dəmir yolu əlaqəsinə malikdir, həmçinin Axalkalaki–Qars dəmir yoluna çıxışı var.

O həmçinin qeyd edib ki, Azərbaycan ərazisindən keçən dəmir yolu açılıb və yaxın zamanda TRIPP layihəsi fəaliyyətə başlayacaq.

Ermənistanın Baş naziri əlavə edib ki, ölkə həm Avrasiya İqtisadi İttifaqında üzvlüyünü davam etdirəcək, həm də Avropa İttifaqı standartlarına uyğun islahatlar aparacaq.

Onun sözlərinə görə, Ermənistan hələlik bu iki istiqaməti paralel şəkildə davam etdirə bilər, lakin seçim etməli olacağı halda qərarı xalq verəcək.

Baş nazir qeyd edib ki, onun əsas vəzifəsi alternativ imkanlar yaratmaqdır.

Bundan əvvəl Rusiya Prezidenti Vladimir Putin bildirmişdi ki, Ermənistanın Avropa İttifaqına inteqrasiya istiqamətində atdığı addımlar Avrasiya İqtisadi İttifaqı ilə əməkdaşlığın dayandırılmasına və mövcud güzəştlərin itirilməsinə gətirib çıxara bilər.