Paşinyanın iqamətgahında müəmmalı görüş | Partiya üzvləri niyə bir araya gəldi?

Ermənistan parlamentinin hakim Mülki Müqavilə Partiyasının üzvləri Baş nazir Nikol Paşinyanın Göyçədəki iqamətgahında toplaşıblar. Bu barədə “Hraparak” məlumat yayıb.

Nəşr iddia edir ki, “Paşinyanın ailəsinə çox xərc düşməməsi üçün” qonaqlar hərəsi 25 min dram, təxminən 107 manat xərcləyib.

Məlumata görə, budəfəki toplantı əvvəlkilərdən fərqlənib. Belə ki, hansısa ciddi danışıqlar olmayıb, yalnız əyləncə formatında keçib. Tədbirə DJ dəvət olunub, partiya üzvləri rəqs edib, əyləniblər.

N.Paşinyan qonaqlara otaqları, hamam-tualeti, manqal sahəsini və digər hissələri göstərib. Daha sonra Ermənistan Baş naziri partiya üzvlərini qayıqla Göyçə gölü səyahətinə çıxarıb.

“Hraparak” yazır ki, N.Paşinyan bununla ölkədə keşiş Baqrat Qalstanyanın etirazlarının gözlənildiyi vaxtda “hər şey qaydasındadır, narahat olmağa heç bir əsas yoxdur” mesajını verib.