Peskov Ukraynanı belə günahlandırdı | Kiyev bu problemlərin...

“Özlərini kollektiv Qərb ölkələri adlandıranlar Ukraynadakı münaqişəyə görə artıq “boğaza qədər zibilə batıb”.

Bunu Kremlin rəsmi nümayəndəsi Dmitri Peskov deyib.

Bildirib ki, Kiyevin Kursk bölgəsinə hücumları da özbaşına deyil. Onun sözlərinə görə, bu hadisə regionda həddindən artıq gərginlik yaradır.

Kremlin sözçüsü onu da qeyd edib ki, avqustun 6-da Kursk vilayətinə təşkil edilən hücum Ukraynanın “Rusiya ərazisini ələ keçirmək planının” bir hissəsi idi. D.Peskov bu hadisəni uğursuz cəhd kimi qiymətləndirərək Ukraynaya dəstək olan Qərb ölkələrini qınayıb.

“Kursk Atom Elektrik Stansiyasında nüvə təhlükəsinin artmasında Ukrayna tərəfinin günahı daha aydın görünür. Atom Enerjisi üzrə Beynəlxalq Agentliyin rəhbəri Rafael Qrossi ilə baş tutan danışıqların sonunda “Rosatom” belə qərara gəldi ki, PUA zərbələrinin məhz AES tərəfə endirilməsi ciddi təhlükə deməkdir.

Amma buna baxmayaraq, məlum səbəblərə görə sözügedən qurumun məsuliyyət daşıyanları elan etmək səlahiyyətinin olmaması faktı dəyişmir. Hər şey göz qabağındadır. Ukrayna bütün bu problemlərin və təhlükələrin özəyidir”, – deyə o bildirib.

Xatırladaq ki, Rusiya Prezidenti Vladimir Putin avqustun 22-də ölkənin Belqorod, Bryansk və Kursk vilayətlərində vəziyyətlə bağlı iclas keçirib. O, iclas zamanı bildirib ki, Ukrayna Ordusu Kursk AES-ə zərbələr endirməyə cəhd edib. Rusiya lideri müvəqqəti olaraq Kursk vilayətinin qubernatoru vəzifəsini icra edən Aleksey Smirnovdan stansiyanın hazırkı vəziyyətini də soruşub. O isə cavabında vəziyyətin stabil və nəzarət altında olduğunu bildirib.