Peskov Zelenskinin dediklərini təkzib etdi | "Rusiya heç bir mükafat əldə etməsin" - Baku TV

Rusiya Prezidenti Vladimir Putinin mətbuat katibi Dmitri Peskov Ukrayna Prezidenti Volodimir Zelenskinin növbəti danışıqların ABŞ-də keçirilməsinin planlaşdırıldığı barədə dediklərini təkzib edib.

Kremlin sözçüsü bu barədə “RİA Novosti”yə açıqlaması zamanı danışıb.

O belə bir planın olmadığını və bu barədə heç bir müzakirə aparılmadığını bildirib.

Peskov daha sonra əlavə edib ki, növbəti görüşün dəqiq tarixi hələ müəyyən edilməyib, lakin onun tezliklə baş tutması gözlənilir.

Qeyd edək ki, Ukrayna Prezidenti Volodimir Zelenski Ukrayna, Rusiya və ABŞ arasında növbəti üçtərəfli görüşün ABŞ-də keçiriləcəyinin gözlənildiyini deyib. Zelenski Ukrayna və Rusiya tərəfləri ilə Birləşmiş Ərəb Əmirliklərində keçirilən iki günlük görüş və danışıqlardan sonra ölkənin danışıqlar komandasının məruzəsini dinlədiyini bildirib.

O qeyd edib ki, bir sıra məsələləri telefonla müzakirə etmək mümkün olmadığı üçün danışıqlar komandasını tam hesabat üçün Kiyevdə gözləyir.

Zelenski vurğulayıb ki, Ukrayna sülhü real şəkildə yaxınlaşdıra, onu etibarlı və uzunmüddətli edə biləcək bütün işçi formatlara açıqdır.

Ukrayna lideri bildirib ki, müharibə elə başa çatmalıdır ki, Rusiya aqressiyaya görə heç bir mükafat əldə etməsin.