Peskovdan ABŞ və Rusiya liderlərinin görüşü haqqında açıqlama

“Vladimir Putin və Donald Trampın təşkil etməyə razılaşdıqları Rusiya-ABŞ sammiti onların ABŞ və Rusiyaya mümkün səfərlərindən əvvəl baş tutacaq”.

Bunu Rusiya Prezidentinin mətbuat katibi Dmitri Peskov jurnalistlərə açıqlamasında deyib.

“Onlar qarşılıqlı dəvətnamələr mübadiləsi aparıblar. Yəni indi Prezident Trampın Rusiyaya səfər etmək üçün etibarlı dəvəti var. Rusiya Prezidentinin də Amerika Birləşmiş Ştatlarına səfər etmək üçün etibarlı dəvəti var. Başqa bir nüans da odur ki, onlar üçüncü ölkədə olduqca tez bir zamanda işgüzar görüş keçirməyə razılaşıblar”, – deyə D.Peskov bildirib.

Onun sözlərinə görə, Rusiya və ABŞ prezidentləri arasında mümkün görüş yeri kimi Ər-Riyadın adı çəkilsə də, bununla bağlı yekun qərar yoxdur.

“Ər-Riyad hər iki ölkə üçün münasibdir. Doğrudan da, Ər-Riyadın adı çəkilib, amma indiyə qədər bu məsələ ilə bağlı nə işçi səviyyəsində, nə də ən yüksək səviyyədə heç bir qərar qəbul edilməyib. Hələlik görüşün Ər-Riyadda, yoxsa başqa bir paytaxt şəhərdə olacağı məlum deyil. Belə bir görüşə hazırlaşmaq üçün vaxt lazımdır. Bu, həftələr, hətta bir neçə ay çəkə bilər”, – deyə o bildirib.

D.Peskov həmçinin qeyd edib ki, Rusiya ABŞ-ni Ukraynadakı vəziyyətin nizamlanması üzrə danışıqlarda əsas həmsöhbəti hesab edir.