Peskovdan Avropa İttifaqının qərarına sərt cavab

“Avropa İttifaqının Rusiyaya qarşı sanksiyaların tətbiq oluna biləcəyi sahələrin resursları tükənmək üzrədir. Bunu təşkilatın bəyan etdiyi on ikinci sanksiyalar paketi sübut edir”.

Bu barədə Kremlin mətbuat katibi Dmitri Peskov jurnalistlərə açıqlamasında deyib.

O, Avropa İttifaqının Rusiya almazlarına qarşı qəbul etdiyi qadağalara da münasibət bildirib. Qeyd edib ki, rəsmi Moskva buna hazır idi.

“Düşünmürəm ki, bu sanksiyalardan yan keçmək üçün hansısa variant yoxdur. Bu variantlar mövcuddur və onlar həyata keçiriləcək", – deyə Kreml rəsmisi əlavə edib.

Qeyd edək ki, dekabrın 18-də Avropa İttifaqı rəsmi Moskvaya qarşı 12-ci sanksiyalar paketini elan edib. Bu tədbirlər Rusiya iqtisadiyyatının yüksək dəyərli sektorlarını hədəf alaraq və İttifaqın sanksiyalarından yan keçməyi çətinləşdirərək bu ölkənin müharibə aparmaq qabiliyyətinə daha bir zərbə vurur.

Qadağalar paketinə əsasən, Avropa İttifaqı Rusiyadan almazların birbaşa və ya dolayı yolla idxalına, alınmasına və ya ötürülməsinə qadağa qoyur. Bu da Rusiya mənşəli almazlara, ölkədən ixrac edilən almazlara və Rusiyada tranzit keçən brilyantlara şamil edilir.