Peskovun İstanbul görüşü ilə bağlı gözləntiləri | İrəli qaçmağa ehtiyac yoxdur...

Kreml Rusiya və ABŞ diplomatlarının İstanbul görüşündən gözləntilərini açıqlayıb.

Rusiya Prezidentinin mətbuat katibi Dmitri Peskov həmçinin ABŞ ilə danışıqlarda Rusiyanın yeni ərazilərinin statusu ilə bağlı da danışıb.

Kremlin sözçüsü Donetsk, Luqansk, Zaporojye və Xerson vilayətlərinin Rusiyanın subyektinə çevrildiyini söyləyib:

“Ölkəmizin Konstitusiyasında qeyd olunan Rusiyanın subyektinə çevrilmiş ərazilər Rusiya Federasiyasının ayrılmaz hissəsidir. Bu, tamamilə danılmaz və müzakirə olunmayan faktdır. Hazırda ekspertlər səviyyəsində İstanbulda görüş keçirilir.

Diplomatlarımız iki prezident arasında telefon danışığı zamanı əldə olunan anlaşmanı və yüksək səviyyəli nümayəndə heyətləri arasında Ər-Riyadda əldə olunmuş razılaşmaları inkişaf etdirmək üzərində işləyirlər. Əminliklə deyə bilərəm ki, Donald Tramp həm danışmağı, həm də dinləməyi bacarır. Danışıqların çətin keçəcəyi istisna olunmur. Amma faydalı olacağına əminəm”.

D.Peskov hələlik irəli qaçmağa ehtiyacın olmadığını deyib. O, danışıqların nəticələri barədə məlumat veriləcəyini bildirib.

Xatırladaq ki, fevralın 27-də İstanbulda Rusiya və ABŞ diplomatlarının görüşü keçirilib.