Pezeşkian etiraz etdi | Onlar bizi qorxutmaq üçün hədələyirlər

İran Prezidenti Məsud Pezeşkian amerikalı həmkarı Donald Trampın neft ixracına tətbiq olunacaq sanksiya xəbərdarlığına etiraz edib.

“İndi Tramp bizə sanksiya tətbiq etmək istədiyini və neft satmağımıza icazə verməyəcəyini deyir. Nefti olmayan ölkələr necə yaşayır? Biz neft satmasaq, yaşaya bilməyəcəyik? Kim deyib ki, İran ancaq neftlə yaşamalıdır? Onlar bizi hədələyirlər ki, qorxaq, titrəyək, bazarımız da çöksün. İnam olarsa, heç bir çətinlik yaranmayacaq”, ‒ deyə Pezeşkian qeyd edib.

Bu arada, İran lideri ABŞ ilə danışıqların bərpasını istisna etməyib.

O, ABŞ-nin danışıqlar aparmaq qabiliyyətini sübut edəcəyi təqdirdə Vaşinqtonla danışıqların bərpa oluna biləcəyini söyləyib. “Sanksiyalardan qorxmaq lazım deyil. Bəziləri deyir ki, bizim ABŞ ilə danışıqlar masasına oturmaqdan başqa çarəmiz yoxdur. Lakin biz danışıqlar aparmayacağımızı da deməmişik. Sadəcə, quldurlar qarşısında baş əyməyəcəyik. Bizdə belə bir deyim var: əvvəl qohumluğunu sübut et, sonra mirasa iddia edərsən”, ‒ deyə o söyləyib.

Pezeşkian vurğulayıb ki, əvvəlcə hər cür sanksiya tətbiq edib, sonra danışıqlar aparmağı təklif etmək olmaz.