Pezeşkianla Makron arasında telefon danışığı | Siz olsaydınız, nə edərdiniz?

Fransa Prezidenti Emmanuel Makron ABŞ-nin İranın nüvə obyektlərinə zərbələrindən sonra İran lideri Məsud Pezeşkianla telefonla danışıb.

Makron "X"dəki paylaşımında vəziyyətin təhlükəli olduğunu bildirib.

Söhbət zamanı Fransa lideri Tehranı nizamlanma üçün diplomatik mexanizmlərə qayıtmaq məqsədilə gərginliyi azaltmağa və maksimum təmkin nümayiş etdirməyə çağırıb.

Pezeşkian isə öz növbəsində “ABŞ bizə hücum edib. Siz bu vəziyyətdə olsaydınız, nə edərdiniz? Təbii ki, bu addım cavabsız qalmamalıdır, İran nüvə obyektlərinə endirilən zərbələrə görə ABŞ-yə qarşılıq verməlidir”, – deyə Makrona cavab verib.

Pezeşkian həmçinin Tehranın həmişə danışıqlara açıq olduğunu, lakin qarşı tərəfin İran xalqından təslim olmağı tələb etdiyini bildirib.

Onu da qeyd edək ki, Fransa Prezidenti regiondakı mövcud vəziyyəti qiymətləndirmək üçün bir sıra Yaxın Şərq liderləri ilə, o cümlədən Səudiyyə Ərəbistanının vəliəhdi, Oman Sultanı, BƏƏ Prezidenti və Qətər əmiri ilə də telefon danışıqları aparıb.