Podolyak Ukrayna Ordusunun son vəziyyəti ilə bağlı Baku TV-yə danışdı

Son vaxtlar Ukraynada Xarkov vilayəti istiqamətində Rusiya Ordusunun irəliləməsi ciddi ajiotaj yaradıb. Xüsusilə də sərhəddə müharibənin yenidən qızışması vəziyyətin gərginliyini daha da artırıb.

Ukrayna Prezident Ofisinin müşaviri Mixaylo Podolyak Ukrayna Ordusunun bu istiqamətdə anidən geriləməsini və hazırkı vəziyyəti şərh edib.

O, Ukraynanın müdafiə sisteminin yetərli olmadığını bildirib.

“Xarkov istiqamətində baş verənlərə baxaq. Rusiya il ərzində çox sayda resurs yığdı, bunlar canlı qüvvə, döyüş sursatıdır və buna görə də aktivləşib. Ukraynada bəzi hərbi proqramlar bloklandı və buna görə də bizdə resurs qıtlığı yarandı. Nə vaxtsa Ukrayna yenə də effektiv müdafiə üçün kifayət qədər resursa sahib olacaq. Yəni tezliklə ABŞ yardımı tam olaraq açılacaq, Avropa yardımı artırılacaq. Əlavə olaraq hazırda Rusiya əsas istiqamətlərdə özümüzü müdafiə etməyimiz çətin olsun deyə cəbhə xəttini uzatmağa çalışır. Bu, əsas ərazilər – Donetsk, Luqansk və Zaporojyedir”, – M.Podolyak qeyd edib.

O vurğulayıb ki, Donetsk istiqamətində sərt döyüşlər hələ də davam edir: “Donetskdə daha çox artilleriyadan istifadə edilir. Orada Rusiya texnikası və hərbi personalı məhv edilir. Yəni bu ərazilər Rusiya üçün də prioritet olaraq qalır”.

M.Podolyak əlavə edib ki, Xarkovdan ərazi tutmağa cəhd edən Rusiya qoşunları oradakı sərhəd ərazilərdən irəli getməyib. Rusiya Şimali Xarkov istiqamətində Ukrayna ərazisinə maksimum 10 kilometr irəliləyib. Bu səbəbdən hazırda Xarkovda ağır döyüşlər gedir.

Qeyd edək ki, hazırda Ukraynanın Xarkov vilayətinin Vovçansk şəhəri də daxil olmaqla Rusiya Ordusu ilə Ukrayna Ordusu arasında qızğın küçə döyüşləri gedir.