Poroşenko Ukrayna hökumətinin istefasını tələb edib

Ukrayna Ali Radasının noyabrın 18-də keçirilən iclasında ədliyyə naziri German Qaluşenko və energetika naziri Svetlana Qrinçukun istefası baş tutmayıb.

Buna səbəb Ukraynanın müxalifətçi deputatlarının müzakirə və səsvermədə iştirak etmədən tribunanın qarşısını kəsməsi olub. Onların tələbləri iki nazir yox, bütün hökumətin istefasıdır.

Qeyd edək ki, Ukraynanın “Energoatom” dövlət şirkətində 100 milyon dollarlıq korrupsiya ilə əlaqədar istintaq başladığı üçün ölkənin Prezidenti ədliyyə və energetika nazirlərini istefaya çağırıb. Zelenski çıxışında deputatların da onun bu qərarını dəstəkləyəcəyinə ümid edib.

Lakin Ukraynanın müxalifətçi deputatları onun ümidlərini doğrultmayıb. Əsas diqqət isə Kiyevdə 2013-cü il noyabrın 21-də başlayan “Avromeydan” etirazları ilə Viktor Yanukoviçi devirib 2014-cü ildə prezident seçilən Petro Poroşenkoya yönəlmişdi.

Noyabr ayı “Roşen kralı” üçün bir dəfə uğur gətirsə də, 2019-cu ildə Volodimir Zelenskiyə uduzan siyasətçinin revanş şansları azdır. Hər halda, ekspertlər belə düşünür. Amma Ukraynada daxili-siyasi vəziyyət onsuz da qənaətbəxş deyildi, çünki ölkənin şərq hissəsi qarış-qarış zəbt olunur. Bu azmış kimi, 100 milyonluq korrupsiya qalmaqalı Avropa tərəfindən dəstəklənən Zelenskinin xalq tərəfindən dəstəklənməsini zəiflədir.

ABŞ Prezidenti Donald Trampla ilk görüşdən sonra Zelenskinin əvəzlənməsi daha çox aktuallaşmışdı. Lakin Trampla ikinci dəfə görüşmək üçün Zelenski Ağ Evə getdi və soyuqluq nisbətən aradan qalxdı.

İtaliyanın “Corriere della Sera” qəzetində qeyd olunub ki, Ukraynada seçkilər keçirilsə, Zelenski qələbə qazanmayacaq. Onun yerinə ən real namizədlər isə Ukraynanın Böyük Britaniyadakı səfiri Valeri Zalujnı, Kəşfiyyat İdarəsinin rəisi Kiril Budanov və “Azov” milli batalyonunun təsisçisi Andrey Biletskidir.