Prezidentdən təcili göstəriş | Keniyada etiraz aksiyalarında son vəziyyət

Keniya Prezidenti Uilyam Ruto ölkədə ciddi etirazla qarşılanan və iğtişaşa səbəb olan vergi artımına dair qanun layihəsini geri götürəcəyini deyib.

O bu barədə ölkə parlamentində çıxışı zamanı bildirib.

“Mən öz yerimə və parlamentin üzvləri adından, o cümlədən Keniya xalqının adından etiraz aksiyalarında yaxınlarını itirənlərin ailələrinə başsağlığı verirəm. Mən qərar verdim ki, 2024-cü il üçün nəzərdə tutulan maliyyə üzrə qanun layihəsini imzalamayacağam. Ümumiyyətlə, bu layihə ləğv olunacaq. Mən bu barədə parlamentin üzvləri ilə də razılığa gəldim və bildirmək istəyirəm ki, bu bizim kollektiv mövqeyimizə çevrilib.

Mən prezident ofisindən başlayaraq bütün sahələrdə xərclərin azaldılması üçün təcili şəkildə tədbirlərin həyata keçirilməsi üçün göstəriş verirəm. Bundan əlavə, konfidensial səs fonduna ayrılan maliyyə aradan qaldırılacaq. Eyni zamanda səyahətlərin sayının azaldılması məqsədilə də xərclər aşağı salınacaq”, – U.Ruto vurğulayıb.

Qeyd edək ki, bu, son onilliklər ərzində Keniyada baş verən ən yaddaqalan hadisələrdən birinə çevrilib. Hökumət dövlət borcunu ödəyə bilmək məqsədilə əhalidən vəsait toplamaq istəyirdi. Lakin keniyalılar sözügedən qanun layihəsini birmənalı qarşılamadılar. Nəticədə ölkədə iğtişaşlar başladı. Aksiyalar zamanı 20-dən artıq insan həyatını itirdi. Yüzlərlə adam yaralandı.