PUA hücumuna görə Moskvanın bəzi aeroportlarının işi dayandırılıb

Ukrayna Ordusu Rusiyaya dronlarla hücum edib.

Rusiya Müdafiə Nazirliyinin məlumatına görə, sutka ərzində 100 pilotsuz uçuş aparatı zərərsizləşdirilib. 46 PUA Bryansk səmasında vurulub. Dron hücumları Kaluqa, Belqorod, Krasnodar, Orlov, Ulyanovsk, Krım, Stavropol, Kursk, Smolensk və Tulada da qeydə alınıb.

Rusiyanın hava hücumundan müdafiə sistemləri Ukraynaya məxsus PUA-ları məhv edib. Moskva regionu da hücuma məruz qalıb, 6 dron zərərsizləşdirilib. 4 PUA isə Moskva şəhərinə istiqamətlənərkən vurulub.

Moskvanın hücuma məruz qaldığına görə bəzi aeroportlar işini müvəqqəti dayandırıb. Bu barədə Rusiya paytaxtının meri Sergey Sobyanin məlumat verib.

Ukrayna Silahlı Qüvvələrinin Baş Qərargahından verilən məlumata görə, sutka ərzində Rusiyanın 1150 hərbçisi məhv edilib. 4 tank, 3 zirehli maşın, 20 artilleriya sistemi, 313 PUA, 79 avtomobil və 2 xüsusi texnika sıradan çıxarılıb.

Rusiya Ordusu Donetsk vilayətinin Pokrovsk rayonunun Mirnoqrad şəhərinə daxil olub, küçə döyüşləri gedir. Bu barədə “Şərq” qruplaşmasının sözçüsü Qriqori Şapoval məlumat verib.

Şəhər artilleriya sistemi ilə atəşə tutulur, həmçinin hücumda PUA-dan istifadə olunur. Rusiya hava zərbələri ilə quru qoşunlarının Pokrovskun daxilinə irəliləməsinə şərait yaratmağa çalışır.