Putin imperiyanı genişləndirmək üçün bunu edir | Britaniya XİN-dən təcili çağırış

Böyük Britaniyanın xarici işlər naziri Devid Kemeron amerikalı konqresmenləri Vladimir Putinə qarşı siyasətdə Adolf Hitlerlə edilən səhvləri təkrarlamamağa və Ukraynaya milyardlarla dollarlıq hərbi yardım barədə qərarı təcili təsdiq etməyə çağırıb.

Bu barədə BBC məlumat yayıb.

“1930-cu illərdə Adolf Hitlerə qarşı göstərilən zəifliyi nümayiş etdirməyimizi istəmirəm. İstəmirəm ki, V.Putinə qarşı 2008-ci ildə Gürcüstanı işğal edərkən göstərdiyimiz zəifliyi, 2014-cü ildə Krımı və Donbasın böyük hissəsini ələ keçirərkən qeyri-müəyyən cavabımızı təkrar edək. Çünki bu, onun bizə daha baha başa gələn 2022-ci ildə yeni bir təcavüz aktı törətməsinə səbəb oldu.

Bir tərəfdə Qərbdən kənarda oturaraq öz imperiyasını genişləndirməyə ümid edən V.Putin dayanır. O, bizim zəif olduğumuzu düşünür. O, həyatımızda gördüyümüz ən sarsıdıcı təcavüz aktından qurtula biləcəyini sanır. Digər tərəfdə isə biz durmuşuq. Bizim resurslarımız, iqtisadi gücümüz, biliyimiz var.

İqtisadiyyatımız Rusiyadan 25 dəfə güclüdür. Onlar kömək üçün Pxenyana müraciət etməli olublar. Yetər ki, gücümüzdən istifadə edək. Sual: İradəmiz varmı?”, – o bildirib.