Putin Ukraynada dövlətçiliyin itirilməsindən danışdı | Bu əlamətlər artıq özünü göstərir...

“2024-cü ildə xüsusi əməliyyat çərçivəsində 189 yaşayış məntəqəsi azad edilib”.

Bu barədə Rusiya Prezidenti Vladimir Putin Müdafiə Nazirliyinin kollegiya iclasında çıxışı zamanı bildirib.

Onun sözlərinə görə, Rusiya Silahlı Qüvvələri təmas xətti boyunca strateji təşəbbüsə nəzarət edir. V.Putin çıxışı zamanı həmçinin Ukraynanın hazırkı rəhbərliyinin qeyri-legitim olduğunu söyləyib.

Prezident Ukrayna Konstitusiyasında prezidentin səlahiyyətlərinin uzadılması yolunun göstərilmədiyini və bu səbəbdən də hərbi vəziyyətə istinadın əhəmiyyəti olmadığını vurğulayıb.

“Ukraynada dövlətçiliyin itirilməsi əlamətləri özünü göstərməyə başlayıb”, – deyən Vladimir Putin qeyd edib ki, Rusiyanın strateji nüvə arsenalında müasir silah nümunələrinin payı 95 faiz təşkil edib.

“Ordu və donanmanın müasir silah və texnika nümunələri ilə yenidən təchiz edilməsi sürətlə davam edir”, – deyə Rusiya lideri əlavə edib.