Putin və Rəisi görüşdə nələrdən danışdı?

7 dekabrda İran Prezidenti İbrahim Rəisinin Moskvaya səfəri zamanı Rusiya lideri Vladimir Putinlə 5 saatdan artıq davam edən təkbətək görüşündə Ermənistan məsələsi xüsusi diqqət mərkəzində olub.

Bu barədə Rusiya mediasının məlumatlarına əsasən informasiya yayılıb. Bildirilib ki, Rusiya media ekspertləri Rəisi və Putinin Cənubi Qafqaz regionu ilə bağlı danışarkən Ermənistanın qərbyönlü siyasətini müzakirə etdiyini bildiriblər.

“Ümumi yanaşmaya görə, Cənubi Qafqaz Tehran və Moskva üçün lazımdır, amma Qərbsiz. Üstəlik, bu kontekstdə Azərbaycan ümumi tərəfdaş, Ermənistan isə problemli reallıq kimi qəbul edilir. İrəvan-Paris əməkdaşlığının, xüsusilə müdafiə əlaqələrinin dərinləşməsi, o cümlədən Fransanın Ermənistana silah tədarükü kontekstində Tehran və Moskva həm baş verənlər, həm də baş verəcəklərdən xüsusilə narahatdır”, – məlumatda qeyd edilib.

Məlumatlarda vurğulanıb ki, İran İrəvan üçün yaxşı qonşu və etibarlı tərəfdaş olmaqda davam edir, lakin Rusiya mətbuatında yayılan fikirlərə görə, Ermənistanın qərbyönlü mövqe tutması Tehranda şübhələr yaradır:

“Ermənistan qərbyönlü mövqeyini dərinləşdirsə, ola bilsin ki, Tehran Azərbaycanla daha sıx münasibətlər quraraq regional siyasi mühiti tarazlaşdırmağa çalışacaq”.