Putin və Trampın görüşü baş tutmayacaq? | Şərtlər müzakirə edildi

ABŞ dövlət katibi Marko Rubio və Rusiya xarici işlər naziri Sergey Lavrov Ər-Riyadda keçirilən danışıqlarda Rusiya və ABŞ arasında münasibətlərdə “qıcıqlandırıcı məqamları” aradan qaldırmaq üçün məsləhətləşmə mexanizminin yaradılması barədə razılığa gəliblər.

Bu barədə ABŞ Dövlət Departamentindən yayılan açıqlamada bildirilib.

Qeyd olunub ki, Rubio və Lavrov Ukraynadakı münaqişənin həlli üçün danışıqlar qrupları yaratmağa qərar veriblər.

Eyni zamanda Rubio və Lavrov ümumi geosiyasi maraq doğuran məsələlərdə əməkdaşlıq etmək barədə razılıq əldə ediblər. Rusiyanın xarici işlər naziri və ABŞ dövlət katibi iqtisadiyyat və investisiyalar sahəsində gələcək əməkdaşlıq haqqında da razılığa gəliblər. ABŞ Dövlət Departamentindən bildirilib ki, Rusiya ilə ABŞ arasındakı zəng və görüş “davamlı sülh” üçün yetərli olmayıb, lakin Ər-Riyadda irəliyə doğru mühüm addım atılıb.

Rusiya Prezidentinin köməkçisi Yuri Uşakov isə açıqlamasında bildirib ki, Ər-Riyadda yüksək səviyyəli Rusiya-Amerika danışıqları 4 saat yarım davam edib:

“Rusiya və ABŞ prezidentləri Vladimir Putin və Donald Trampın görüşü gələn həftə çətin baş tutsun, lakin bunun üçün şərtlər müzakirə olunub”.

Y.Uşakov əlavə edib ki, liderlərin görüşünün təşkili üçün iki ölkənin nümayəndə heyətlərindən gərgin iş tələb olunur.

“Biz razılaşdıq ki, Rusiya və ABŞ danışıqlar qrupları Ukrayna üzrə təmaslara başlasınlar. ABŞ ilə Ukrayna üzrə əlaqələrin nə vaxt başlayacağına Rusiya Prezidenti Vladimir Putin özü qərar verəcək”, – deyə o qeyd edib.