Putin Zelenskinin məktubunu oxumayıb?

Rusiya Prezidenti Vladimir Putin ukraynalı həmkarı Volodimir Zelenskinin açıq məktubu ilə tanış olub.

Bu barədə Putin Sankt-Peterburq Beynəlxalq İqtisadi Forumunun plenar iclasında bildirib.

"Mətbuat katibi Dmitri Peskov mənə bu məktubu hələ dünən göstərmişdi. Lakin bizim Özbəkistan Prezidenti ilə işgüzar görüşümüz, işgüzar şam yeməyimiz var idi. Düzünü desəm, baxmağa macal tapmadım. Bu gün səhər Peskov yenə kağızı mənə uzatdı. Mən ona ötəri baxdım", – deyə Putin danışıb.

O həmçinin qeyd edib ki, Moskva və Kiyev münaqişənin nizamlanması üzrə əsas məsələləri öz aralarında həll etməlidir, digər ölkələr isə qarant kimi çıxış edə bilər.

"Təbii ki, əsas məsələləri Rusiya və Ukrayna öz aralarında həll etməlidir. İstər ABŞ-dəki, istərsə də dünyanın digər regionlarındakı həmkarlarımız şərait yarada və qarant kimi çıxış edə bilərlər. Biz bundan çıxış edirik", – deyə o bildirib.

Qeyd edək ki, iyunun 4-də Ukrayna Prezidenti Volodimir Zelenski Rusiya lideri Vladimir Putinə şəxsi görüş və danışıqlar müddətində atəşkəs təklifi ilə açıq məktub yazıb.