Putindən Qəzzadakı müharibə ilə bağlı tənqid | BMT heç nə etmir

Prezident Vladimir Putin dekabrın 14-də ilin yekunlarına dair ənənəvi brifinqini keçirib.

Bir çox suallara cavab verən və gündəmdə olan məsələlərə aydınlıq gətirən Kreml rəhbəri İsrail-HƏMAS münaqişəsindən də danışıb.

“Anadolu” Xəbər Agentliyinin əməkdaşının “Türkiyə və Rusiya Yaxın Şərqdə gedən bu müharibəni dayandırmaq üçün nə edir?” sualına Vladimir Putin tutarlı cavab verib. Kreml rəhbəri çıxışında Birləşmiş Millətlər Təşkilatını tənqid etməyi də unutmayıb:

“Rəcəb Tayyib Ərdoğan Qəzzadakı ölümlərin qarşısını almaq üçün əlindən gələni edir və sülhün yaradılmasında çox böyük səylər göstərir. Qəzzada baş verənlər müsibətdir. Bütün dünya Ukraynaya dəstək verir, halbuki orada qadın və uşaqlar tərəfimizdən qətlə yetirilmir. Bəs niyə Qəzzada susur? Qəzza dünyanın ən böyük uşaq qəbiristanlığına çevrilib. BMT bu mövzuda heç nə etmir.

Onlar üçün fələstinlilərin ölümündə qeyri-adi bir şey yoxdur. Çünki təşkilat mahiyyətini itirib. BMT dövlətlər arasında konsensusa nail olmaq məqsədilə yaradılıb, lakin indi bu baş vermir.

Biz R.T.Ərdoğanla daim danışırıq və görüşməyi planlaşdırırdıq. Amma R.T.Ərdoğanın qrafiki ilə əlaqədar olaraq görüşməyimiz alınmadı. Ona görə də biz, çox güman ki, ilin əvvəlində Türkiyədə görüşəcəyik”.

Qeyd edək ki, Vladimir Putinin brifinqində zalda federal və regional Rusiya KİV nümayəndələri, habelə ölkədə akkreditə olunmuş xarici jurnalistlər iştirak ediblər. Kreml rəhbərinə 1 milyon insan telefon bağlantısı ilə, 6 milyon nəfər isə məktubla sual ünvanlayıb.