Putini gözləyən təhlükə: britaniyalı ekspert "Vaqnerçilər"in qisasından danışdı

“Vaqner” özəl hərbi şirkətinin rəhbəri Yevgeni Priqojinin təyyarə qəzasında öldüyü barədə xəbərlər dünya gündəmini zəbt etdiyi bir vaxtda britaniyalı yazıçı, Rusiya üzrə ekspertin açıqlaması hər kəsi təəccübləndirib.

Belə ki, Keir Cayls onun ölüm xəbərinə şübhə ilə yanaşdığını, Y.Priqojinin şəxsi təhlükəsizliyinə həmişə ciddi yanaşdığını, səyahət planlarını və harada olduğuna dair məlumatları dəfələrlə gizlətdiyini deyib:

“Hər kəs Y.Priqojinin Rusiyada qaldırdığı qiyamdan sonra uzun müddət sağ qalmasına təəccüblənmişdi. Rusiya Müdafiə Nazirliyi ilə hesablaşmaq fikrinə düşərək Vladimir Putinə meydan oxuyan Y.Priqojin bilməli idi ki, onun ölümü bir göz qırpımında baş verə bilər. Y.Priqojinin iyunun 24-də Moskvadan sağ çıxması Rusiya üçün böyük təhlükə idi. Əgər Yevgeni, doğrudan da, ölübsə, o zaman Rusiyanın işi daha çətin olacaq. Çünki Y.Priqojinin yüzlərlə əsgəri onun qisasını almaq istəyəcək. Liderlərini itirmək onlar üçün ağır olacaq. Unutmayaq ki, Y.Priqojin dəfələrlə Rusiya Müdafiə Nazirliyini sərt tənqid edib. Başqası bunu edə bilməzdi. Bu da o deməkdir ki, Moskvada Y.Priqojini qoruyan hərbçilər var və əgər o, hazırda sağdırsa, bu, onların sayəsində baş verib”.

Keir Cayls əlavə edib ki, Y.Priqojinin olduğu təyyarədə, əslində, nə baş verdiyini heç kim heç vaxt bilməyəcək.