Putinin məqsədi ifşa edildi, NATO cavabını verdi | NATO ölkəsinə hücumun sensasiyalı detalı

“Polşanın hava məkanı dronlar tərəfindən pozulandan sonra NATO-nun qüvvələri ilk dəfə Rusiya ilə döyüşə girdi. Bu, Rusiya Prezidenti Vladimir Putinin necə riskə gedə biləcəyini və NATO-nun hazırlıq səviyyəsini göstərdi”.

Bu sözlər “The Telegraph”da yayılan yazıda qeyd olunub.

“Varşava Rusiya dronlarının Ukraynaya hücumu ilə bağlı məlumatı alandan sonra Hava Hücumundan Müdafiə sistemləri hazır vəziyyətə gətirilib” deyilən məqalədə o da qeyd olunub ki, bu, Polşa üçün qeyri-adi hal deyil:

“Qeyri-adi olan hava məkanının pozulmasıdır. Nəticədə, Niderland və İtaliyanın da kəşfiyyat təyyarələri havaya qalxıb. İki “F-35”, iki “F-16” qırıcı təyyarəsi və bir neçə helikopter vəziyyəti nəzarətdə saxlayıb”.

“Vladimir Putin bununla nəyə nail olmaq istəyir?” sualı isə “Politico”da yayılan yazıda qeyd olunub. Məqalədə bildirilib ki, Rusiya dronlarının Polşa hava məkanını pozması Avropa ilə hərbi gərginlik kimi yozulur.

19 pilotsuz uçuş aparatının hava məkanını pozduğunu deyən Polşanın Baş naziri Donald Tusk bildirib ki, Rusiyanın aqressiv planlarının olması şübhə doğurmur.

Qeyd edək ki, bu, NATO üzvü olan ölkənin səmasında 19 PUA-nın radarlara düşüb bəzilərinin vurulduğu ilk hadisədir.

Polşanın xarici işlər naziri Radoslav Sikorski bəyan edib ki, NATO və Polşanın Hərbi Hava Qüvvələri hadisəni araşdırıb. Məlum olub ki, dronlar idarəetmədən çıxmayıb və hücum ediblər.