Putinin nüvə xəbərdarlığından sonra ABŞ-dən gözlənilməz qərar

“ABŞ Ukraynaya qoşun yeritmək niyyətində deyil”.

Bu barədə ABŞ Dövlət Departamentinin sözçüsü Metyu Miller jurnalistlərə açıqlamasında deyib.

O bildirib ki, Rusiyanın potensial nüvə münaqişəsi yaratmaq təhlükəsinə baxmayaraq, ölkədə nüvə qüvvələrinin döyüş hazırlığı səviyyəsi artırılmayacaq:

“Hər hansı bir nüvə gücü olan ölkənin ictimaiyyətə belə silahların istifadəsi barədə danışması düzgün deyil. Əvvəllər də bu cür açıqlamaların şahidi olmuşuq.

Qeyd etmək istəyirəm ki, həmin ölkələr üçün bu cür bəyanatlar çox məsuliyyətsiz və yersiz addımdır. Lakin biz nüvə ilə bağlı mövqeyimizi dəyişmək üçün heç bir səbəb görmürük. Bir daha qeyd etmək istəyirəm ki, Prezidentin də vurğuladığı kimi, biz Ukraynaya qoşun və ya hərbi qüvvə göndərməyi düşünmürük”.

Məlumat üçün bildirək ki, bundan əvvəl Rusiya Prezidenti Vladimir Putin Federal Məclisə müraciəti zamanı ölkəsinin strateji nüvə qüvvələrinin tam hazırlıq vəziyyətinə gətirildiyini bildirib. Kreml rəhbəri eyni zamanda Qərb ölkələrinə Ukraynaya qoşun göndərməmək barədə xəbərdarlıq edib və belə bir qərarın nəticələrinin faciəli olacağını vurğulayıb.