Putinin planları alt-üst olacaq? - Müharibədə gözlənilməz həmlə

Kreml rəhbəri Vladimir Putinin mayın 9-da birtərəfli atəşkəs elan etməsinə cavab olaraq Ukrayna indi öz tələblərini irəli sürməlidir, nəinki razılaşmalıdır.

Bu barədə Ali Radanın Milli təhlükəsizlik, müdafiə və kəşfiyyat məsələləri komitəsinin katibi Roman Kostenko bildirib.

O qeyd edib ki, Ukrayna ABŞ-yə müharibə istəmədiyini göstərmək üçün Putinin ilk atəşkəsi – “Pasxa atəşkəsi” ilə razılaşıb. Lakin Ukrayna bunu nümayiş etdirərək növbəti atəşkəs üçün şərtlər irəli sürməlidir:

“Atəşkəs hər iki tərəfin şərtləri və bu müddət ərzində nə olacağı barədə qərar verdiyi ikitərəfli razılaşmadır. Amma belə çıxır ki, Putin birtərəfli qaydada bunu bir dəfə təqdim edib və biz razılaşdığımızı göstərmək üçün razılaşdıq. Hesab edirəm ki, burada bizim tərəf şərtlər irəli sürməlidir: “Əgər barışıq istəyirsənsə, o zaman mən ya 30 gün, ya da heç olmasa, hər iki tərəfin razılaşdıracağı müddətin tərəfdarıyam”. Ancaq Putinin bunu istədiyi üçün sadəcə birtərəfli atəşkəsə getmək, mənim nöqteyi-nəzərimdən, zəiflik əlamətidir. Bu, ikitərəfli razılaşma olmalıdır, ya da Putinin dediklərinə məhəl qoyulmamalıdır”.