Putinin sülhü istəməməsinin əsas səbəbləri | İki lideri üz-üzə qoyan müharibə

“ABŞ Prezidenti Donald Tramp Kremlin apardığı siyasətdə məyus olduğunu bildirərək rusiyalı həmkarı Vladimir Putinə Ukraynadakı savaşı dayandırmaq üçün 10 gün vaxt verib. Moskva imtina etsə, ABŞ-nin ağır sanksiyaları ilə üzləşəcək. Bu artıq Ağ Ev Rəhbərinin Putinə ünvanladığı ikinci ultimatumdur. Öncəki müddət 50 gün idi”.

Bu sözlər “Atlantic Council”də yayılan məqalədə qeyd olunub.

Bildirilib ki, Tramp Putin üçün kifayət qədər sərfəli sülh təklif etsə də, Kremlin rəhbəri razılaşmayıb. Hazırda isə Tramp eskalasiyanın azaldılması fonunda Rusiyaya güzəştə getmək fikrindən dönüb.

“Halbuki Tramp Krımın da anneksiyasını qəbul edə bilərdi. Heç Rusiyanın hərbi cinayətlərə görə məsuliyyətə cəlb olunmasının da lehinə deyildi. Bəs dönüş nöqtəsi nə oldu? Məlumata görə, buna səbəb Trampın avropalı müttəfiqlər vasitəsilə Ukraynanın silahlandırılmasına müsbət cavab verməsidir.

Hazırda Vaşinqtonda hərbi yardımların effektivliyi müzakirə olunur. Çünki çatdırılan sistemlərin müharibənin gedişatına necə təsir edəcəyi bilinmir.

O ki qaldı Putinin sülhdən imtina etməsinə, bununla bağlı üç əsas faktor irəli sürülüb. Birincisi, hücumların ləng olmasına baxmayaraq, Kreml savaşda qələbə qazanacağına əmindir. İkincisi, 2022-ci ildən Rusiya iqtisadiyyatı müdafiə sənayesi hesabına ayaqda saxlanılır. Hərbi gəlirlər sanksiya itkilərini ört-basdır edir. Atəşkəsdən sonra hərbi zavodlar gücləndirilmiş rejimdə işləməyəcək və qazanc mənbəyi risklərlə üzləşəcək.

Üçüncü səbəb daxili stabillikdir. Belə ki, çünki sülh əldə olunan halda ölkəyə yüksək gəlirə öyrəşmiş yüz mindən çox müharibə veteranı qayıdacaq. Bu isə Rusiyadaxili stabilliyi pozacaq. Həm də Ukraynanın müstəqilliyi Rusiyanın imperialist xislətinə təhdiddir”, ‒ deyə məqalədə qeyd olunub.