Putinlə Orbanın Moskva görüşünün detalları açıqlandı

Rusiya və Macarıstan mövcud çətin geosiyasi vəziyyətdə dialoqu davam etdirirlər, bu, vacibdir. Bu baxımdan Viktor Orbanla faydalı, səmimi söhbət olub.

Bu barədə Rusiya Prezidenti Vladimir Putin Macarıstanın Baş naziri Viktor Orbanla görüşündən sonra keçirdiyi mətbuat konfransında bildirib.

"Moskva və Budapeşt sağlam praqmatizm və qarşılıqlı fayda prinsipləri əsasında bir sıra sahələrdə əməkdaşlığı davam etdirirlər", – deyə Rusiya lideri bildirib.

V.Putin qeyd edib ki, V.Orbanla aktual məsələlər, o cümlədən Ukrayna ətrafındakı vəziyyətlə bağlı danışıb, mümkün nizamlanma yollarını müzakirə edib. V.Orbanın Kiyevə səfəri və Ukrayna rəhbərliyi ilə təmasları müzakirə olunub.

V.Putin bildirib ki, rəsmi Moskva Ukraynada nizamlanmanın müzakirəsinə açıq olsa da, Kiyev bunu istəmir. Ukrayna hərbi əməliyyatların dayandırılmasına imkan vermir, çünki bu vəziyyətin uzadılması üçün bəhanə aradan qalxır. Hərbi vəziyyət ləğv edilsə, seçkilər keçirilməli olacaq.

Rusiya lideri əlavə edib ki, reytinqini itirmiş Ukrayna rəhbərliyinin seçkilərdə qalib gəlmək şansı sıfıra yaxındır.

"Rusiya Ukraynadakı münaqişənin atəşkəs və ya pauzaya deyil, Moskvanın səsləndirdiyi şərtlərlə tamamilə dayandırılmasının tərəfdarıdır”, – deyə Vladimir Putin vurğulayıb.