Qallantın yerinə gələn yeni nazir əsas vəzifələrini açıqladı | Qəzzada nələr baş verəcək?

İsrailin yeni müdafiə naziri İsrael Katz Qəzza zolağında radikallar tərəfindən saxlanılan girovların qaytarılmasını özünün əsas vəzifəsi adlandırıb.

O, müvafiq bəyanatı “X”də paylaşıb.

“Baş nazir Benyamin Netanyahuya mənə göstərdiyi etimada görə təşəkkür edirəm. Biz birlikdə çalışacağıq ki, düşmənlərimiz üzərində qələbə qazanaq və müharibənin məqsədlərini həyata keçirək. Bu, ən mühüm missiya olaraq bütün girovların geri qaytarılması, Qəzzada HƏMAS-ın məhv edilməsi və Livanda “Hizbullah”ın məğlubiyyəti, İranın təcavüzünün qarşısını almaq və İsrailin şimal və cənubunda yaşayanların sağ-salamat öz evlərinə qayıtmasıdır”, – deyə İsrael Katz bildirib.

Qeyd edək ki, İsrailin Baş naziri Benyamin Netanyahu müdafiə naziri Yoav Qallantı istefaya göndərib. Onun yerinə İsrailin xarici işlər naziri İsrael Katz təyin edilib. Yoav Qallant 29 dekabr 2022-ci ildən müdafiə naziri vəzifəsini icra edirdi.