Qapıya vurub qışqırdım ki... | Türkiyəli ata və oğula İsveçdəki yanğınla bağlı qəhrəman adı verildi

İsveçin paytaxtı Stokholmda mənzildə baş verən yanğını görən Türkiyə vətəndaşı Məsut Zengin və 14 yaşlı oğlu çox sayda insanın həyatını xilas edib.

Yanğınsöndürənlərlə birlikdə alovun söndürülməsində iştirak edən Məsut Zengin tüstüdən zəhərləndiyinə görə xəstəxanada iki gün müalicə olunub.

“Yanğın yaşadığım binanın 4-cü mərtəbəsində başlayıb. Hadisənin baş verdiyi evə yaxınlaşıb qapını döyərək içəri girdim. Oradakılara evlərində yanğın olduğunu dedim, sonra isə çalışdığım qədər alovu söndürdüm. Birdən başım hərləndi, ayılanda gördüm ki, ambulansdayam”, − Məsut Zengin söyləyib.

İsveçin məşhur qəzetinin manşetində yer alan ata və oğul sosial şəbəkədə “qəhrəman” kimi qələmə verilib. Hadisə ölkədə yaşayan türk icması tərəfindən də müsbət qarşılanıb. Onlara cəmiyyətə nümunə olduqları üçün plaket təqdim edilib.