ABŞ-də ölənlərin sayı 100 nəfəri ötdü

ABŞ-də qar fırtınası səbəbindən ölənlərin sayı 100-ü ötüb.

Şimali Karolina ştatının qubernatoru Coş Stayn bildirib ki, əlverişsiz hava şəraiti səbəbindən ştatda minlərlə yol-nəqliyyat hadisəsi baş verib:

"Bu gün əsas mesajımız yollardan uzaq durmaqdır. Beləliklə, hamımızın təhlükəsizliyini təmin etmək üçün yol işçilərinə və hüquq-mühafizə orqanlarına vəzifələrini icra etməyə imkan verəcəksiniz. Nəqliyyat Departamenti mümkün qədər çox qar təmizləmək üçün 2500 nəfər əlavə işçi ilə işləyir. Lakin bizim qorxumuz odur ki, növbəti günlərdə temperatur sıfırın altında olacağı üçün ştatın bir çox yerində əksər yollar daha pis vəziyyətdə olacaq".

Ölkə üzrə 170 mindən çox ev elektrik enerjisiz qalıb. ABŞ Milli Meteorologiya Xidməti soyuq hava şəraitini olduqca nadir hal kimi təsvir edərək, bir çox bölgədə bütün zamanların ən aşağı temperaturunun qeydə alındığını açıqlayıb.

Şimali Karolinanın bəzi rayonlarında qarın hündürlüyü 30 santimetri ötüb. Milli Hava Xidməti artıq Corciya, Tennessi, Kentukki və bir neçə başqa ştat üçün çovğun xəbərdarlığı edib.