Qazaxıstan Müdafiə Nazirliyindən açıqlama

Qazaxıstan Müdafiə Nazirliyi Ermənistana silah tədarükü ilə bağlı xəbərləri təkzib edib. Bu barədə Nazirliyin yaydığı bəyanatda deyilir.

Qeyd edilib ki, bir sıra sosial şəbəkə hesablarında və xəbər portallarında Qazaxıstanın guya Ermənistana silah satmaq niyyətində olması ilə bağlı yayılan xəbərlər həqiqəti əks etdirmir:

“Qazaxıstan hökuməti 2022-ci ildən etibarən silah və hərbi texnikanın ölkədən ixracına qadağa qoyub. Bununla əlaqədar vətəndaşlardan və KİV nümayəndələrindən yayılan şayiələrə reaksiya verməməyi və yalnız rəsmi mənbələrə etibar etməyi xahiş edirik”, – deyə Müdafiə Nazirliyinin rəsmi bəyanatında bildirilib.

Xatırladaq ki, bir müddət əvvəl Ermənistanın müdafiə naziri Suren Papikyan çıxışlarının birində ölkəsinin Qazaxıstanı potensial hərbi texnika tədarükçüsü hesab etdiyini bildirmişdi. Hərbi-texniki əməkdaşlıqla bağlı yeni tərəfdaşlıq axtarışının vacibliyini vurğulayan nazir Ermənistanın Qazaxıstandan “TOS-A” reaktiv yaylım atəşi sistemlərini almaq planlarını açıqlamışdı.