Qazaxıstanda referendum keçiriləcək?

Qazaxıstan Prezidenti Kasım-Jomart Tokayev Konstitusiya referendumunun keçirilməsi və 2026-cı ildə yenidən prezident seçkisində iştirak planları ilə bağlı fikirləri təkzib edib.

O, yerli mediaya açıqlamasında yayılan xəbərləri dezinformasiya adlandırıb. Bildirib ki, Konstitusiyaya belə fundamental məsələ ilə bağlı özbaşına əlavələr edilməsi artıq mümkün deyil. İslahat Əsas Qanuna özbaşına dəyişikliklərin edilməsi məqsədilə aparılmayıb.

Kasım-Jomart Tokayev vurğulayıb ki, qanunda vahid prezidentlik müddəti ilə bağlı müddəa dəyişməzdir. Onun sözlərinə görə, bu norma dövlətin müstəqilliyi, unitarlığı, ərazi bütövlüyü və idarəetmə forması ilə bağlı normalar kimi sarsılmazdır.

Qeyd edək ki, yenilənmiş Konstitusiyaya əsasən, Qazaxıstanda prezidentlik yeddi il müddətinə təyin edilir və dövlət başçısı yalnız bir dəfə seçilə bilər.