Qərb Gürcüstandakı seçkilərə niyə müdaxilə edir? | Markov regiondakı təhlükədən danışdı

“Qərbin Gürcüstanda keçiriləcək parlament seçkilərinə xüsusi diqqət yetirməsinin başlıca səbələrindən biri Rusiyaya qarşı apardığı sərt hibrid müharibədir”.

Bu sözləri rusiyalı politoloq Sergey Markov sözügedən seçkilərə xarici müdaxilələri, xüsusilə Qərbin bu istiqamətdə fəal iştirakını şərh edərkən deyib.

Bildirib ki, Qərb ölkələri Gürcüstanda cərəyan edən hadisələrdən Rusiyaya qarşı istifadə etmək istəyirlər:

“Qərbin Gürcüstanda keçiriləcək parlament seçkilərinə xüsusi diqqət yetirməsi təsadüfi deyil. Niyyətləri regiondakı hadisələrə nəzarət etməklə yanaşı, Gürcüstanı öz tərəfinə çəkərək bu ölkəni rəsmi Moskvaya qarşı tətbiq edilən iqtisadi sanksiyalara cəlb etməkdir. Baş verənlərin fonunda hakim partiya Rusiyaya qarşı sanksiyalar tətbiq etməkdən sərt şəkildə imtina etdi.

Qərb hazırda seçkilərdən çox, ölkədə xaos yaratmaq məqsədilə kütləvi etirazların təşkili ilə məşğuldur. “Gürcü Arzusu” partiyası isə haqlı olaraq Qərbdən gələn heç bir dəstəyi qəbul etmir. Gürcüstanın yürütdüyü siyasətə təsir etmək cəhdləri onu göstərir ki, Qərb demokratik seçkilərə hörmət etmir”.

Sergey Markov əlavə edib ki, Qərbin “Demokratik dəyərləri müdafiə etmək” adı altında seçkilərə bu şəkildə müdaxiləsi Gürcüstanın suverenliyinə zərbə vurmaqla yanaşı, regionda sabitliyin pozulmasına hesablanıb. Bu isə öz növbəsində ciddi nəticələrə gətirib çıxara bilər.