Qəzza zolağı ətrafında hərbi toqquşmalar davam edir

Qəzza zolağı ətrafında hərbi toqquşmalar davam etdiyi bir vaxtda HƏMAS-ın bu qədər silahı necə topladığı maraq doğurur.

Dünya mediası bu mövzuda təhlillər dərc edir. Kəşfiyyat xidmətlərinin bir-birindən maraqlı araşdırmaları var.

HƏMAS İsrailə qarşı minlərlə raket, çoxsaylı pilotsuz uçuş aparatı və saysız-hesabsız kiçik silahlardan və qumbaralardan istifadə edib. Təxminən 2,5 milyon əhalinin yaşadığı kasıb bir bölgə olan Qəzza iki tərəfdən İsrail, bir tərəfdən isə Misirlə əhatə olunub. Aralıq dənizindəki nəzarətin də İsraildə olduğunu bilirik.

Odur ki, İsrailin hava və dəniz blokadası altında olan və ciddi nəzarətdə saxlanılan bölgəyə HƏMAS-ın bu böyüklükdə hücumu həyata keçirmək üçün kifayət qədər silahı necə topladığı sual doğurur.

CNN bu sualın cavabını belə verir: “Hiyləgərlik, improvizasiya, əzmkarlıq və xaricdəki xeyriyyəçilər”.

ABŞ və İsrail HƏMAS hücumunun arxasında İranın olduğuna dair dəlil tapa bilməsələr də, CNN-də aparılan təhlildə İranın HƏMAS-ın ən mühüm hərbi dəstəkçisi olduğu və Aralıq dənizi blokadasından yayınan gizli transsərhəd tunellər və qayıqlar vasitəsilə bölgəyə silah göndərdiyi iddia edilir.

HƏMAS-ın yüksək rütbəli rəsmisi Əli Barakə də bu iddianı təsdiqləyən açıqlamalar verib. Sözügedən hücuma 2 ildir hazırlaşdıqlarını bildirib:

“250 km, 160 km, 80 km və 10 km mənzilli raketlər üçün, minaatan və onların mərmiləri üçün zavodlarımız var. “Kalaşnikov” avtomatları və onların patronları üçün istehsal müəssisələrimiz mövcuddur. Patronları ruslardan aldığımız icazə əsasında istehsal edirik. Onları Qəzzada hazırlayırıq”.