Qəzza zolağına kim nəzarət edəcək? – Sakinlər bu ölkələrə köçürülsə...

Yaxın Şərqdə davam edən atəşkəsin fonunda, hər kəsi bir sual maraqlandırır. Qəzza zolağına kim nəzarət edəcək?

Məsələ ilə bağlı ABŞ Prezidenti Donald Tramp artıq öz versiyasını irəli sürüb.

O, İsrail Baş naziri Benyamin Netanyahu ilə görüşdən sonra Qəzza zolağının xarabalığa, təhlükəli zonaya çevrildiyini deyib. Tramp sakinlərin Misir və İordaniya kimi ölkələrə köçürülməsini təklif edib. Lakin onun təklifi istər regional qüvvələr, istərsə də kənar dövlətlər tərəfindən birmənalı qarşılanmayıb.

Bütün bunlara baxmayaraq, ABŞ lideri sözündən dönməyib və Qəzza üçün xüsusi planı olduğunu da bir daha xatırladıb.

Trampa İsrailin müdafiə naziri İsrael Katsdan dəstək gəlib. Nazir İsrail Silahlı Qüvvələrinə fələstinlilərin Qəzza zolağından könüllü surətdə çıxmaları üçün konkret plan hazırlamağı tapşırdığını bəyan edib.

Vaşinqton rəhbərinin cəsarətli təklifini alqışlayan Kats belə bir köç prosesinin Qəzza əhalisinin dünyanın müxtəlif ölkələrində yerləşməsi üçün şərait yaradacağına əmin olduğunu bildirib.

“Proses quru yolu ilə yanaşı dəniz və hava yolları vasitəsilə də həyata keçirilə bilər. Hər kəs istədiyi yerə köçə bilər”, – deyə israilli nazir vurğulayıb. Onun fikrincə, qəzzalıların xüsusilə İspaniya, İrlandiya və Norveç kimi ölkələrə gedişi mümkündür.

“Onlar fələstinlilərə sığınacaq verməsələr, deməli, ikiüzlüdürlər. Bu ölkələrin sırasına Kanada da daxildir”, – deyə Kats özünə bəraət qazandırıb.

Bu arada, Tehranın Xarici İşlər Nazirliyi Qəzzaya nəzarət və fələstinlilərin zorla köçürülmə planının yolverilməz olduğunu açıqlayıb.

“Fələstinlilərin guya Qəzzadan təhlükəsiz əraziyə köçürülmələri və regionun üçüncü dövlət tərəfindən nəzarətə götürülməsi planı İsrailin Fələstin xalqını tamamilə aradan qaldırmaq məqsədi daşıdığını göstərir. İran bu plana qətiyyətlə etirazını bildirir”, – deyə Tehranın Xarici İşlər Nazirliyinin məlumatda qeyd olunub.