Qəzza zolağında qida tapmaq çətinləşib

Beynəlxalq Qızıl Xaç Komitəsinin əməkdaşları israilli girovların axtarışı üçün Qəzza zolağındadır. Qəzza zolağında Qızıl Xaç Komitəsinin əməkdaşlarını HƏMAS-ın silahlıları qarşılayıb.

Oktyabrın 10-da İsrail ilə HƏMAS arasında atəşkəs qüvvəyə minəndən indiyədək sağ qalan 20 girov İsrailə təhvil verilib. 24 meyitin qalıqları da qaytarılıb.

Qeyd edək ki, Qəzzada axtarış-xilasetmə işləri getdiyi üçün bəzi problemlər qalmaqdadır. Yəni Qəzza zolağı hələ savaşdan əvvəlki həyata qayıda bilməyib. Humanitar yardımın çatdırılması bir yana, insanlar yerli məhsul da ala bilmirlər.

“Mənim yaralı oğlum var. Ona yemək aparmaq istəyirəm. Onun sağalmaq üçün qidaya ehtiyacı var. Yeganə çıxış yolu balıqdır. O, baha olsa da, mən bunu oğlum üçün almağa məcburam. Müharibədən əvvəl biz həftədə 2-3 dəfə balıq alırdıq. Lakin indi bu qiymətlərlə yalnız ildə bir dəfə bunu etmək mümkündür. Bir kiloqram balıq 30-50 dollar pul deməkdir. Ucuz balıqlar var, lakin onlar keyfiyyətsizdir. Qiymətlər isə çox bahadır. 2 kiloqram balıq üçün 100 dollar pul verməlisən. Bu həddindən artıq çoxdur”, – deyə Qəzza sakini Rami Əl Kurdi bildirib.

Qeyd edək ki, oktyabrda əldə olunan atəşkəsdən sonra humanitar yardımın çatdırılmasında ciddi problemlər müşahidə olunur. Atəşkəs planının növbəti mərhələsinə görə, İsrail hər iki tərəf üçün razılaşdırılan sarı xətdən geri çəkilməlidir. Qəzzanın idarəsi üçün keçid hakimiyyəti yaradılmalı və HƏMAS tərk-silah edilməlidir. Son olaraq isə yenidənqurma işlərinin görülməsi planlaşdırılır.