Qəzzada atəşkəs razılaşmasının birinci mərhələsi tamamlanıb?

HƏMAS-ın yüksəkvəzifəli rəsmisi İsraillə atəşkəs razılaşmasının birinci mərhələsinin tamamlandığını, ikinci etap və Qəzzanın gələcək idarəçiliyinin davam edən gərginliklər fonunda qeyri-müəyyən qaldığını iddia edib.

Bildirilib ki, İsraillə bu yaxınlarda əldə edilən atəşkəs razılaşmasını hərtərəfli və ya yekun razılaşma deyil, yalnız "ilkin razılaşma" kimi təsvir etmək olar. “HƏMAS birinci mərhələ üzrə öhdəliklərini yerinə yetirib”, ‒ deyə rəsmidən açıqlama verilib.

Bundan başqa, qeyd etmək lazımdır ki, İsrail 10 oktyabrda qüvvəyə minən atəşkəs razılaşmasından sonra Qəzzada 1500-dən çox binanı dağıdıb. “BBC Verify” komandası tərəfindən nəzərdən keçirilən və sonuncu dəfə 8 noyabrda çəkilən peyk görüntüləri İsrailin Qəzzada söküntü işlərini “geniş miqyasda” davam etdirdiyini göstərir.

Qəzza atəşkəsinin birinci mərhələsi 10 oktyabrda qüvvəyə mindikdən bəri, girovların qalıqlarının qaytarılması, İsrail hərbi əməliyyatlarının dayandırılması və digər məsələlərdə irəliləyiş əldə edilib. Lakin həm İsrail, həm də HƏMAS dəfələrlə bir-birini atəşkəsi pozmaqda ittiham edib, ara-sıra toqquşmalar qeydə alınıb.

Qəzzanın səhiyyə orqanlarından bildirilib ki, atəşkəs qüvvəyə mindikdən bəri İsrailin hücumları nəticəsində 245 nəfər ölüb, 623 nəfər yaralanıb.

Analitiklərin fikrincə, atəşkəsin birinci mərhələsi əsasən humanitar yardım və qısamüddətli tədbirlərə yönəlib, ikinci mərhələ isə mürəkkəb siyasi danışıqları və uzunmüddətli təhlükəsizlik tənzimləmələrini əhatə edəcək. Bu isə ikinci mərhələni daha mürəkkəb və çətin hala gətirir.