Qəzzada silahlar yenidən işə salınır? - Yaxın Şərqlə bağlı gərgin vəziyyət

“HƏMAS hərəkatı fevralın 15-i günortaya qədər israilli girovları azad etməsə, İsrail Ordusu Qəzza zolağında intensiv hərbi əməliyyatları bərpa edəcək”.

Bunu İsrailin Baş naziri Benyamin Netanyahu hərbi-siyasi kabinetin 4 saatlıq iclasının yekunu ilə bağlı açıqlamasında deyib.

“Bu, qəbul etdiyim və Nazirlər Kabinetinin yekdilliklə təsdiqlədiyi qərardır. Əgər HƏMAS şənbə günü günortaya qədər girovlarımızı qaytarmasa, atəşkəs ləğv ediləcək və İsrail Ordusu HƏMAS nəhayət məğlub olana qədər intensiv hərbi əməliyyatlara davam edəcək”, – deyə Baş nazir bildirib.

HƏMAS hərəkatı isə öz növbəsində İsrailin anklavda atəşkəs razılaşmasının müddəalarına əməl etmədiyi təqdirdə Qəzza zolağında qalan girovları azad etmək niyyətində olmadığını bildirib.

HƏMAS ABŞ Prezidenti Donald Trampın fevralın 15-də girovların azad edilməməsi ilə bağlı hədələrinə cavabında bildirib ki, təhdid dili vəziyyəti çətinləşdirir və yersizdir.

“HƏMAS Qəzza zolağı ilə bağlı razılaşmaya sadiqliyini təsdiqləyir. Qəzza ilə bağlı razılaşmanın şərtlərinə əməl etmək girovları azad etməyin yeganə yoludur”, – deyə HƏMAS-ın yaydığı bəyanatda bildirilib.