Qəzzadakı münaqişə ilə bağlı yeni itkilər və faktlar açıqlandı

İsrail Müdafiə Ordusu oktyabrın 7-də İsrailə hücum zamanı HƏMAS tərəfindən əsir götürülən 4 girovun öldüyünü təsdiqləyib.

Bu barədə İsrail ordusunun sözçüsü Daniel Haqari bildirib. Onun sözlərinə görə, ölənlərin ailələrinə artıq məlumat verilib. Lakin İsrail ordusunun nümayəndəsi girovların necə və nə vaxt öldüyünü açıqlamayıb. Digər bir məlumata görə, atəşkəsdən sonra İsrailin Qəzza zolağını atəşə tutması nəticəsində 200-ə yaxın sakin həlak olub.

Anklavın Səhiyyə Nazirliyindən verilən xəbərə görə, 1 dekabr səhər saatlarından indiyədək İsrailin Qəzzaya təcavüzü nəticəsində 178 nəfər həlak olub. Nazirlik 589 nəfərin xəsarət aldığını qeyd edib. Qurbanların əksəriyyəti qadınlar və yeniyetmələrdir.

İsrail Müdafiə Qüvvələri Fələstinin HƏMAS hərəkatını atəşkəsi pozmaqda ittiham edib və Qəzza zolağında hərbi əməliyyatları bərpa etdiyini bəyan edib.