Qəzzanın idarətetməsi hansı dövlətə həvalə ediləcək? | Netanyahu açıqladı

“İsrail bütün Qəzza zolağına hərbi nəzarəti ələ keçirməyi, lakin sonra bunu ərazini düzgün idarə edə biləcək ərəb ölkələrinin silahlı qüvvələrinə verməyi planlaşdırır”.

Bunu İsrailin Baş naziri Benyamin Netanyahu “Fox News” telekanalına müsahibəsində deyib.

“Biz bunu etmək niyyətindəyik, amma orada qalmaq istəmirik. Təhlükəsizlik perimetri yaratmaq planlarımız arasındadır, lakin Qəzzanı idarə etmək və orada hakim qüvvə olmaq istəmirik”, ‒ deyə o, İsrailin 26 millik bütün sahil zolağına nəzarəti ələ keçirmək niyyətində olub-olmaması ilə bağlı sualı cavablandırarkən söyləyib.

Netanyahunun sözlərinə görə, İsrailin məqsədi Qəzzanı İsrailə təhlükə yaratmayan və anklav sakinləri üçün layiqli həyatı təmin edəcək şəkildə idarə edəcək “ərəb qüvvələri”nə verməkdir.

Qeyd edək ki, bu bəyanat Qəzzada humanitar vəziyyətlə bağlı İsrailin ünvanına yönələn beynəlxalq tənqidlər, eləcə də anklavın müharibədən sonrakı idarəçiliyinin gələcəyi ilə bağlı müzakirələr fonunda verilib.