Qırğızıstan BMT TŞ-nın müvəqqəti üzvlüyünə namizədliyini irəli sürəcək | Səbəb isə...

“Qırğız Respublikası BMT Təhlükəsizlik Şurasının müvəqqəti üzvlüyünə öz namizədliyini irəli sürəcək”.

Bu barədə ölkənin Prezidenti Sadır Japarov BMT Baş Assambleyasının 79-cu sessiyasında çıxışı zamanı deyib.

Onun sözlərinə görə, Qırğız Respublikası təşkilata daxil olan bütün ölkələrin dəstəyinə ümid edir:

“Buna görə də ölkəmiz 2027-2028-ci illər üçün BMT Təhlükəsizlik Şurasının müvəqqəti üzvlüyünə öz namizədliyini bütün lazımi sənədləri hazırlayaraq irəli sürəcək”.

“Əgər ölkəmiz seçilərsə, Qırğızıstan Şuranın səmərəliliyinin və şəffaflığının artırılmasını, habelə balanslaşdırılmış regional təmsilçiliyi nəzərə alaraq onun tərkibinin genişləndirilməsini müdafiə etməyə davam edəcək. Qırğızıstan da daxil olmaqla, 60 üzv dövlətin Təhlükəsizlik Şurasına heç vaxt üzv seçilməməsi, ayrı-ayrı dövlətlərin isə bir neçə dəfə seçilməsi ədalətsizlikdir”, – deyə Prezident qeyd edib.

Xatırladaq ki, Qırğız Respublikası BMT-nin Təhlükəsizlik Şurasına heç vaxt üzv seçilməyib. Halbuki ölkə dəfələrlə bununla bağlı təşkilata müraciət ünvanlayıb.