Qlobal ərzaq qi̇ymətləri̇ 12 aydır düşür

BMT-nin Ərzaq və Kənd Təsərrüfatı Təşkilatının açıqladığı qlobal ərzaq qiymətləri indeksində ardıcıl 12 aydır ki, enmə müşahidə olunur. Bu göstəricilər əvvəlki ayla müqayisədə mart ayında aylıq 2,15 faiz, son bir il ərzində isə 20,5 faiz azalıb.

Qeyd edək ki, ərzaq qiymətləri indeksi ərzaq malları səbətinin beynəlxalq qiymətlərində aylıq dəyişikliyin ölçüsüdür.

"Mart ayında indeksin azalmasına dənli bitkilərin, bitki yağı və süd məhsullarının qiymət indekslərindəki geriləmə səbəb olub. Şəkər və ətin qiymətlərində isə artım qeydə alınıb", - deyə Ərzaq və Kənd Təsərrüfatı Təşkilatından bildirilib.

Fevralla müqayisədə mart ayında taxıl qiymətlərinin indeksi 5,6 faiz, buğdanın dünya qiymətləri isə 7,1 faiz aşağı düşüb. Bunun əsasında Avstraliyadakı yüksək məhsuldarlıq, Avropa İttifaqında məhsulla bağlı vəziyyətin yaxşılaşması, Rusiyadan tədarükün böyük həcmi və Ukraynanın öz Qara dəniz limanlarında ixracı davam etdirməsi kimi amillər dayanır.

Qarğıdalının dünya qiymətlərində müşahidə edilən 4,6 faiz azalma isə Braziliyada rekord həcmdə məhsuldarlığın gözlənilməsi ilə bağlıdır. Düyünün indeksi də aşağı düşüb: 3,2 faiz. Burada Hindistan, Vyetnam və Tailand daxil olmaqla əsas ixracatçı ölkələrdə davam edən və gözlənilən məhsul yığımı əsas rol oynayır.