Qorxulu zəlzələ Türkiyəni hərəkətə keçirdi | Hansı işlər görüldü?

Türkiyə Prezidenti Rəcəb Tayyib Ərdoğan aprelin 23-ü Mərmərə dənizində baş verən zəlzələ nəticəsində insan itkilərinin olmadığını bildirib.

O bu barədə Təbii Fəlakət və Fövqəladə Halların İdarə Edilməsi Agentliyinin İstanbul qərargahında keçirilən iclasından sonra məlumat verib.

“Mərmərə dənizində baş verən və İstanbulda və ətraf vilayətlərdə hiss olunan 6,2 bal gücündə zəlzələdən zərər çəkən bütün vətəndaşlarımıza ən xoş arzularımı çatdırmaq istəyirəm. Biz AFAD-ın İstanbul regional ofisində geniş toplantı keçirdik. Ən aktual məlumatları aldıq və zəlzələnin nəticələrini minimuma endirmək üçün görülmüş və görülməli olan tədbirləri qiymətləndirdik. Zəlzələnin hiss olunduğu şəhərlərdə apardığımız axtarış və yoxlama tədbirləri nəticəsində heç bir problem aşkar edilməyib. Zəlzələ nəticəsində ölən olmayıb”, ‒ deyə R.T.Ərdoğan qeyd edib.

İstanbul Valiliyinin qərarına əsasən, şəhərin bütün məktəblərinin həyətləri və məscidləri zəlzələ səbəbi ilə gecəni evlərində keçirmək istəməyən vətəndaşların istifadəsinə verilib. İstanbulda məktəblər və universitetlərdə təhsilə 2 gün fasilə verilib.