"Qoyduğumuz investisiyaları geri qaytarsın" | Şirkət rəhbəri

“Rusiya Dəmir Yolları” Ermənistanın dəmir yolu konsessiyası ilə bağlı səsləndirdiyi iddialara cavab verib.

Şirkət rəhbəri Oleq Belozerov bildirib ki, mümkün ödəniş tələbi ilə bağlı açıqlamalar “Rusiya Dəmir Yolları” tərəfindən təəccüb və anlaşılmazlıqla qarşılanıb.

Onun sözlərinə görə, Rusiya tərəfi 2008-ci il konsessiya müqaviləsi çərçivəsində üzərinə götürdüyü bütün öhdəlikləri tam şəkildə yerinə yetirib.

Qeyd olunub ki, bu müddətdə Ermənistanın dəmir yolu infrastrukturu yenilənib, əldə olunan gəlirlər isə inkişaf layihələrinə yönəldilib və səhmdarlara dividend ödənilməyib.

Məlumata görə, 2008–2025-ci illər ərzində dəmir yollarına təxminən 396 milyon dollar investisiya qoyulub. Şirkət həmçinin ölkədə iri işəgötürənlərdən biri olaraq 2500 əməkdaşın maaşlarının mütəmadi artırıldığını bildirib.

Belozerov əlavə edib ki, Debed çayının daşması nəticəsində dəmir yollarına dəyən ziyan Rusiya tərəfindən maliyyələşdirilib, yeni vaqonlar və elektrik qatarları isə parkın yenilənməsinə xidmət edib.

Şirkət rəhbəri vurğulayır ki, konsessiya müqaviləsinə sadiq qalır.

“Rusiya Dəmir Yolları” konsessiya müqaviləsinin şərtlərinə sadiq qalmaq niyyətindədir. Əgər Ermənistan tərəfi müqaviləyə xitam verilməsi və ya onun şərtlərinin dəyişdirilməsi imkanını nəzərdən keçirirsə, bu halda bizim qoyduğumuz investisiyaların geri qaytarılmasını gözləmək hüququmuz var”, – deyə şirkət rəhbəri qeyd edib.