Qrup liderindən düşmənlərlə bağlı qalmaqallı açıqlama | Terrorçulardan sərt hədə

“Əl-Qaidə” terrorçu təşkilatı Qəzza zolağında humanitar vəziyyətə cavab olaraq ABŞ, İsrail və Fars körfəzi ölkələrindən qisas alacağı ilə hədələyib.

Qrupun lideri Saad bin Atef əl-Avlaki ilk açıqlamasını verərək təşkilatın düşmənlərə münasibətdə artıq qırmızı xətlərinin olmadığını vurğulayıb. Son bir ildə bu təşkilat Yəmənin “Ənsar Allah” hərəkatı ilə əlaqələri genişləndirib.

BMT ekspertlərinin fikrincə, Saad bin Atef əl-Avlakinin silahdaşlarının xarici əməliyyatları artırmaq ambisiyaları var.

Əl-Avlaki ABŞ Prezidenti Donald Trampı və onun ətrafını Qəzza zolağında gedən müharibə kontekstində İsrailə dəstək verməyə hazır olduqlarına görə tənqid edir.

Qrup lideri xəbərdarlıq edib: “Qəzzada xalqımızın başına gələnlərdən və baş verənlərdən sonra bizim üçün qırmızı xətlər yoxdur”.

O, videomüraciətində qruplaşmanın fikirlərini bölüşən terrorçuları İsrailin Qəzza zolağındakı hərəkətlərinə dəstək vermələrinə cavab olaraq Misir, İordaniya və Körfəz ölkələri liderlərinə qarşı sui-qəsd cəhdləri etməyə çağırıb.

Yəmənli Saad bin Atef əl-Avlaki 2024-cü ilin martında Səudiyyə Ərəbistanından olan sələfi Xalid Batarfinin ölümündən sonra təşkilatın başına keçib.