"Avronun atası" Jak Delor 98 yaşında vəfat etdi

Avropa Komissiyasının sabiq sədri, həmçinin “Avronun atası” kimi tanınan Jak Delor vəfat edib.

Onun ölüm xəbərini mətbuata qızı Martine Aubrey verib. Bildirib ki, heç bir xəstəlikdən əziyyət çəkməyən atası 98 yaşında Parisdəki evində ölü tapılıb.

Fransa Prezidenti Emmanuel Makron Jak Delorun vəfatı ilə bağlı onun ailəsinə başsağlığı verərək J.Deloru “müasir Avropanın memarı” və “insan ədaləti uğrunda döyüşçü” adlandırıb.

Məlumat üçün bildirək ki, Jak Delorun səyləri nəticəsində ittifaq daxilində sərbəst hərəkəti təmin edən Şengen sazişi bağlanıb, “Erasmus” tələbə mübadiləsi proqramı qəbul edilib. Bundan başqa, Avropanın vahid valyutası olan avronun təsis edilməsi də onun adı ilə bağlıdır.

J.Delor 1985-ci ildən 1995-ci ilə qədər üç dəfə ard-arda Avropa Komissiyasına rəhbərlik edib. Sədr kimi mandatını başa vurduqdan sonra isə siyasətçi qitədə federalizminin inkişafını təşviq etmək üçün beyin mərkəzləri yaradıb.