"Bu, Qərbə baha başa gələcək!" - Rusiyanın yeni hücum planları ifşa edildi?

“Ukraynaya dəstək Qərbi ziyana salır, amma Rusiyanın qələbəsi onlara daha baha başa gələcək. Əgər Avropa və xüsusən də ABŞ bu xərclərdən belə narahatdırsa, müdrik addım atmalı və nəhayət, Rusiyaya maliyyə dəstəyini dayandırmalıdırlar”.

Bunu ABŞ-də praktiki hüquqşünas olan və biznes immiqrasiyası üzrə ixtisaslaşmış köşə yazarı Endi Samotyuk “Forbes”də bildirib.

O qeyd edib ki, Rusiyanın hücumu zamanı Ukrayna ən azı 552 milyard dollar birbaşa itkiyə məruz qalıb: “Bu rəqəm hər gün artır. Qərb artıq Ukraynaya dəstək üçün təxminən 370 milyard dollar xərcləyib. Bu, Rusiya qalib gələrsə, NATO-nun öz müdafiəsinə əlavə xərcləməli olacağı 4,5 trilyon dollarla müqayisədə qəpik-quruşdur”.

Samotyuk ağlabatan maliyyə qərarları qəbul etməyi, daha doğrusu Ukrayna ilə paralel olaraq Rusiyanı maliyyələşdirməyi dayandırmağı təklif edir:

“Qərb ölkələri Rusiya neftini və qazını almağa davam edir, pulu birbaşa Putinin müharibə səylərinə yönəldir. 2022-ci ilin fevral ayından etibarən Qərbin Rusiyadan enerji alması Ukraynaya yardımı üç dəfə artırıb. Amerika və onun müttəfiqləri gizli şəkildə Rusiyanı maliyyələşdirir”.

O xəbərdarlıq edib ki, bu cür uyğunsuzluq, xüsusən də Ukraynaya silah tədarükündəki daimi fasilələri nəzərə alsaq, Rusiyanın qələbə şansı artır. “Forbes”in yazarı bu variantın Qərb dünyasına baha başa gələcəyini vurğulayıb.