"Hamımız qorxurduq, tir-tir əsirdik" | Real həyatın cəhənnəmə çevrildiyi ərazi - Baku TV

Mayın 14-də gecə saatlarından başlayaraq səhərə qədər Ukraynanın paytaxtı Kiyev yenidən kütləvi raket və dron hücumlarına məruz qalıb. Hücumlar nəticəsində şəhərin əsasən sol sahil hissəsində, xüsusilə Darnitski rayonunda ciddi dağıntılar qeydə alınıb, ərazidəki yaşayış və iaşə obyektlərinə ciddi ziyan dəyib.

Ukrayna Silahlı Qüvvələrinin Baş Qərargahından Baku TV-nin Şərqi Avropa bürosuna verilən məlumata görə, Rusiya Ordusu tərəfindən ölkə ərazisinə ümumilikdə 678 dron və 56 müxtəliftipli ballistik raket buraxılıb. Hücumların əsas hədəfi Kiyev olsa da, Odessa, Xarkov, Sumı və Dnepropetrovsk vilayətləri də kütləvi atəşə tutulub. Son bir sutka ərzində ölkə üzrə həlak olanların sayının 10 nəfər olduğu, 100-dən çox şəxsin isə yaralandığı bildirilir.

Dəhşətli gecəni kiyevli sakinlərdən biri belə təsvir edib:

“Gecə saat 02:00 radələrində atəş açmağa başladılar. Heç birimiz yatmamışdıq, hamı həyəcan və qorxu içində idi. Təhlükə anında adətən böyük dəhlizimizə sığınırıq. Birdən elə bir gurultu qopdu ki, az qaldı yıxılaq. Baş verənlərdən şokdayıq. Bu, özbaşınalıqdır”.

Ukrayna rəhbərliyi yaxın günlərdə belə hücumların təkrar olacağı ilə bağlı əhalini xəbərdar edib. Qeyd edək ki, mayın 8-dən 11-nə qədər Rusiya-Ukrayna arasında atəşkəs elan olunmuşdu.