"Hiss etdik ki, bütün bina titrədi" | Mağazalarda məhsul çatışmazlığı başladı - Baku TV

Avqustun 20-də Rusiya Ordusu başda paytaxt Kiyev olmaqla Ukraynanın bir sıra vilayətlərinə yenidən kütləvi hava zərbələri endirib.

Hücumlar zamanı əsasən ərzaq anbarları, enerji infrastrukturu və logistika mərkəzləri hədəfə alınıb. Ümumilikdə Rusiya Ordusu 100-ə yaxın ballistik və qanadlı raket, həmçinin 100-dən çox pilotsuz uçuş aparatı vasitəsilə zərbələr endirib. Hava Hücumundan Müdafiə sistemlərində raket çatışmazlığı səbəbindən raketlərin böyük hissəsi hədəfinə çatıb.

Kiyev, Çerniqov, Xarkov, Poltava və Dnepropetrovsk vilayətlərində elektrik stansiyalarının və ərzaq anbarlarının dağılması səbəbindən mağazalarda ərzaq və qeyri-ərzaq məhsullarının qıtlığı müşahidə olunur. Kiyev vilayətinin Brovarı rayonu isə tamamilə işıqsız qalıb.

Kiyevdə həlak olanların sayı 15-ə, yaralıların sayı isə 40-a çatıb. Ölkə üzrə gün ərzində ölənlərin sayının 40-a çatdığı bildirilir. Dağıntılar altında axtarış-xilasetmə işləri davam etdiyindən tələfat sayının artacağı istisna olunmur.

Kiyev sakinləri baş verənlər haqqında danışıblar.

"Hələ də baş verənləri dərk edə bilmirəm. Hər şey bir anda oldu. Allaha şükür ki, sağam. Binaya girməyə icazə vermirlər, xilasedicilər işləyir. Zərbə çox güclü idi. Həyəcan siqnalı verildikdə zirzəmiyə qaçdıq", – onlardan biri söyləyib.