"Hizbullah"ın gizli hazırlığı ortaya çıxdı, İsrail təcili hərəkətə keçdi

“Hizbullah”ın hücumlara hazırlaşdığını aşkar edən İsrail Hərbi Hava Qüvvələri Livanın cənubuna yeni zərbələr endirib.

Bu barədə İsrail Müdafiə Ordusunun mətbuat katibi, kontr-admiral Daniel Haqari bildirib.

O qeyd edib ki, 20 il ərzində “Hizbullah” Livanın cənubunda silah ehtiyatı yığıb. Hərəkat evlərə adi, qanadlı raketlər və pilotsuz uçuş aparatları yerləşdirib.

“Hizbullah” İsrail ərazisinə kütləvi hücum hazırlayır. Bizdə olan məlumata görə, bu aviazərbələr insan tələfatı və hərbi obyektləri məhv etmək üçün planlaşdırılıb. İsrail Silahlı Qüvvələri adından livanlılara səslənirəm. Evlərində silah gizlədilən livanlıları dərhal həmin ərazini tərk etməyə çağırıram. Tezliklə həmin istiqamətlərə aviazərbələr endiriləcək”, – deyə Daniel Haqari bildirib.

Onu da qeyd edək ki, İsrail hərbi komandanlığı Livanın cənubunda bufer zonası yaratmaq məqsədilə ərazilərin ələ keçirilməsini nəzərdə tutan quru əməliyyatına hazırlaşır. Bunun üçün İsrail Müdafiə Ordusu Qəzza zolağından iki diviziyanı Livan sərhədinə köçürüb. Təl-Əviv fəal şəkildə “Merkava” tanklarını Livanla sərhədə daşıyır.